Nutiziale culturale

Nuciola d’oru, un ghjuvellu à vucazione sulidaria

Ghjè un magnificu ghjuvellu, rialisatu in oru à 18 carati cù diamanti è smeraldi custendu 10 000 euri. Un’opera di u ghjuvellieru Jacques Orsini chì serà da vince durante una tombula in Cervioni, u 23 d’aostu in u quadru di Nuciola in festa. U so fabricante, chì hè dinù megliu operaiu di Francia,  ringrazieghja cusì à modu soiu sta manifestazione induv’ellu participeghja dapoi parechji anni. Cusì, hà imaginatu una creazione unica in leia cù u so fruttu-simbulu. Serà dinù un rigalu sulidariu postu chì l’incasci di a vendita di i ticchetti di tombula sò spartuti trà l’associu organisadore è l’associu A Salvezza. Daretu à a speranza di vince, ci hè soprattuttu a brama chì ogni bigliettu vendutu possi cuntribuì à aiutà quelli chì n’anu bisognu. Eccu quì u veru valore di sta creazione. A brama di l’organisadori hè di fà viaghjà a nuciola d’oru u più pussibule, da bocca in bocca, in e rete suciale, i scontri. Via, qualsiasi a manera pè cresce a sulidarità. Dunque, Jacques Orsini riescerà qualcosa di più preziosu chè di creà un bellu ghjuvellu. Cù a speranza chì a nuciola d’oru porti furtuna à a persona chì a vincerà è chì a tombula rispechji l’investimentu umanu è artisticu di u so creatore.

Pudite cumprà i biglietti à e butteie Alpha di u centru cumerciale Leclerc in Alistru, Marie Ange è Icone-tabac in Moriani è durante a fiera di a nuciola in Cervioni i 21, 22 è 23 d'aostu à u lucale Nuciola in Festa nant’à a Traversa. U ticchettu costa 5 euri.