Nutiziale culturale

'A me lengua', un dischettu in lingua bunifazinca

U prugettu direttu da l'associu bunifazincu Dì Ghi Di Scé hà permessu d'addunì l'artisti corsi ingiru à u bunifazzinu. Cusì, u destinu hà cunduttu Matteu Di Meglio, membru di st'associu, di u gruppu A Pasqualina è prufessore di corsu, sin'à stu dischettu di 14 tituli : 'A me lengua'. Cù u gruppu A Pasqualina, hà acquistatu a sperienza di a scena è di a creazione musicale participendu à a creazione di u dischettu 'Fà mondu' esciutu in u 2020.  Dopu, Matteu hà sceltu di mette sta sperienza à prò di u Bunifazincu è di l'associu 'Dì Ghi Di Scé' chì u difende dapoi trent'anni. Dui altri dischetti in sta lingua sò esciuti in u 1996 è 2007.

In stu filu, Matteu è l'associu pensanu à un prugettu di dischettu chì puderebbe cuncernà a Corsica sana è forse ancu di più pè famigliarisà a ghjente à u bunifazincu è stallu à sente. Cù u so babbu Alain, hè u cumpunitore principale di e meludie di 'A me lengua' cù Jean-Marie Comiti è Jacques Luciani. L'autore Ghjuvan Federicu Terrazzoni ne signa unu cù a so storia famigliale liata à Bunifaziu. Pè u più, i testi sò di u caccaru di Matteu, Cyprien Di Meglio è di u so babbu Alanu cù i canterini Francine Massiani, Jean-Charles Papi, Serge Vacca, Frédéric Poggi, i fratelli Giovanetti di u gruppu Una fiara nova, Doria Ousset o ancu i so amichi di u gruppu A pasqualina, frà altri… I testi, frà quessi nove in bunifazincu è cinque in corsu, parlanu di e storie passate senza nustalgia è di a sucetà d’oghje. Un’opera mustrendu a capacità di u bunifazincu à parlà di tuttu. Ecolugia, pulitica, amore, guerra, pesca... In u filu di e so meludie, u dischettu conta i timori è e speranze, i custatti è e critiche, e pene è i sonnii di parechje generazione di bunifazinchi. Piacerà dinù à e prossime.