Nutiziale culturale

A rivista Kyrn in l’emissione “Dans l’oeil de Kyrn”

Sandra Alfonsi, figliola di u giurnalistu Dominique Alfonsi, hà vulsutu lascià una testimunianza di sta rivista creata da Aimé Pietri chì hà accumpagnatu a Corsica da u 1969 à u 1993. Kyrn evucava prublematiche chì sò sempre d’attualità oghje, per esempiu cù l’articulu di Dominique Alfonsi “ Le temps de l’autonomie” publicatu l’8 di settembre di u 1989 è dinù cù articuli nant’à u grande banditismu, l’ecolugia, i trasporti, a lingua corsa.

U documentariu “Dans l’oeil de kyrn” hè fundatu nant’à dui episodii, sia duie periode di publicazione di 397 numeri. A prima parte redattata da Sampieru Sanguinetti conta a so creazione è u so rolu maiò in u spaziu mediaticu isulanu. A seconda parte hè redattata da Sandra Alfonsi pè rammentà quandu u so babbu vole dà à Kyrn una dinamica nova in leia cù l’imbusche di l’attualità, ma tenendu à contu l’identità di sta rivista, organu di stampa testimone è analistu di u so tempu. Cusì, u novu mudellu di rivista affaccatu in u 1988 hà una squadra redazziunale ingrandata cù a participazione di donne è di cuntributori di a securità civile. Giurnalisti sperimentati è novi. Pè Dominique Alfonsi, ghjè un giurnalismu esigente cù cullaburadori di qualità è mette in risaltu una manera particulare di cuncipì a Corsica pè sensibilisà a ghjente è ancu discitalla. In u 1988, hè l’epuca di l’evuluzione istituziunale, u statutu Joxe, a nascita di a CCM diventata dopu Air Corsica. In stu cuntestu, Kyrn allarga a so osservazione à u Mediterraniu è à l’Europa à prò di una Corsica nova. Campa sin’à u 1993 è sparisce per via di u so mudellu ecunomicu assai pisivu. Sparisce à tempu un’aventura giurnalistica è umana assai originale è un’epuca sana.