Nutiziale culturale

L'appuntamenti di l'associu U Pinziglione per l'annu novu

ò cinqu'anni avà chì l'associu U Pinziglione sparghje i so scopi à prò d'una lingua à mente, scritta è linda, arradicatu à l'usi è e tradizione corse. 'L'associu tantu caru à a so presidente Marianna Suzzarini hà fattu u bilanciu di l'annata passata è prisentatu i so prughjetti per l'annu novu. L'addunita s'hè fatta à a mediateca di Fulelli, per u rituale accunciatu d'un ripastu nustrale assestatu da l'aderenti. L'occasione dinù di scambià in lingua corsa, per una stonda di spressione libera. À modu soiu, i participanti anu presentatu sia una puesia, un libru, puru un filmu o una canzona. Una bella stonda di riflessione ingiru à a lingua corsa, ma dinù una stonda d'amicizia è di leia suciale.'

Sta leia suciale favuriseghja i scontri organisati pè scopre u patrimoniu corsu è i so attori. Cusì, l'associu U Pinziglione face viaghjà i so aderenti da un capu d'annu à l'altru in tutta a Corsica. Prossimu appuntamentu u 27 di ghjennaghju pè scopre u Castellu di Serravale nant'à a cumuna di Pratu di Ghjuvellina cù Stéphane Orsini, guida di a FAGEC. Dopu, u 17 di ferraghju à 6 ore, teatru cù a riprisentazione di 'Babbu Natale u mulizzu', adattazione di u famosu 'Le Père Noël est une ordure' da a truppa I Stroncheghjetta à a mediateca di Fulelli.