Nutiziale culturale

A racolta Florilangues pè fà entre a litteratura in lingue regiunale in i cullegi

Sta racolta inedita cuncoglie 35 testi in 16 lingue regiunale di Francia è d’oltre mare permettendu di studià una diversità linguistica pocu è micca cunnisciuta. U scopu hè di sorte da l’inchjustrera regiunalista, fà di sta diversità un patrimoniu cumunu. Sustenutu da Amin Maalouf, secretariu perpetuale di l’Accademia francese, u cullettivu pè e litterature in lingua regiunale hè statu ricevutu duie volte à u ministeru di l’Educazione Naziunale. Pè a Corsica, a racolta offre un strattu di “A barca di a Madonna” di Ghjacumu Thiers, u puemu “À a sbunurata” di Ghjacumu Fusina è “Sò tessuta” di Lucia Santucci.

In u 1904, Frédéric Mistral ricevia u premiu Nobel pè un’opera scritta in pruvenzale ma sò pochi a sapella oghje. Eppuru, dapoi u Medievu è sin’à u XXIu seculu, scrittrice è scrittori pensanu è scrivenu in altre lingue chè u francese palisendu una diversità culturale chì ùn si trova micca disgraziusamente in prugrammi sculari francesi. Cusì, grazia à Florilangues, u paisaghju litterariu insignatu in i stabilimenti sculari mustrerà a ricchezza di ste lingue. Da l’isula corsa à a terra medievale di i truvadori occitani sin’à e sponde pulinesiane è di u Rhin, ghjè un viaghju inaspettatu in core d’opere troppu scunnisciute. Ogni strattu di stu libru hè traduttu in francese è presentatu da specialisti d’ogni lingua. L’occasione di scopre è fà scopre una litteratura multiplice, viva, arradicata ind’a storia cumuna è ch’ella sia cunnisciuta da tutti l’elevi.