Nutiziale culturale

Scena corsa, una memoria numerica di a creazione musicale isulana

Joëlle Anne Bagard è Jonathan Baticle anu creatu scenacorsa.fr chì vole cuncoglie artisti, evenimenti è lochi dedicati à a musica. Un arnese pensatu pè facilità a scuperta è dà dinù di più visibilità à una scena corsa ogni tantu difficiule à seguità. Cercà un cuncertu, scopre un artistu, ritruvà un gruppu o capì quale sona cun quale. In Corsica, st’infurmazione esistenu ma sò spaperse nant’à e rete suciale, i siti di streaming o i siti di e sale di spettaculu. Cusì, pè truvà un’alternativa à sta spargugliera, i bastiacci Joëlle Anne Bagard è Jonathan Baticle anu creatu Scena Corsa. Ùn hè micca solu un annuariu cunsacratu à a scena musicale isulana, difatti ogni artistu pò dispone d’una schedula chì addunisce biografia, fotografie, video, discugrafia, rete suciale, rete d’ascoltu è prossime date di cuncertu. A ricerca pò esse fatta secondu u generu musicale, u strumentu, a lingua cantata o a cità. Stu situ pò ghjuvà à l’artisti vuluntarii, à l’altre prufessione liate à a musica è à i spettatori. 

Scena Corsa vole mustrà dinù e cunnezzione chì esistenu trà i musicanti, e cullaburazione, i gruppi induve l’artisti participeghjanu o i prugetti ch’elli anu spartutu. Ci truvemu dinù “Scena Parcours”, cum’è un carnettu. Tene l’artisti scuperti, l’evenimenti cunsultati o quistiunarii rialisati. in u filu di a visita, l’utilisadore pò riceve suggestione in leia cù i so gusti. L’ogettivu hè di tuccà i più giovani, è di falli stà à sente novi artisti è d’assiste à un cuncetu.  

Scena Corsa hè digià un successu vicin’à u publicu cù tante è tante visite nant’à u situ, abbunati nant’à Facebook è Instagram. i fundatori di Scena Corsa cercanu oramai partenari pè prusegue l’aventura. Cusì, ne feranu una vera memoria numerica di a creazione musicale isulana postu chì, per Joëlle Anne Bagard è Jonathan Baticle,a scena musicale ùn hè micca solu una lista di date. Hè fatta di scontri, di lochi, di percorsi è di leie chì u situ vole mette in risaltu.