Nutiziale culturale

Ghjuvanteramu Rocchi, L'opara, Puesia, prosa è canti, di Charlotte Rocchi è Sonia Moretti, edizione Alain Piazzola

Ghjuvanteramu Rocchi hà scrittu longu a so vita, pè chjuchi è grandi. Ci laca un'opara folta chì tocca tutte l'età, presente in l'educazione, a literatura è l'arte ma dinù in evenimenti festivi. Pè i più giovani, hà vulsutu custituì un fondu mudernu di filastrocche, puesie è canzone chì riguardanu u mondu zitellinu. Tramandate di leva in purleva, dapoi u 1973, e so creazioni sò arradicate oramai in u nostru patrimoniu cumunu. Attempu sò nati altri scritti. L'autore s'hè pruvatu tandu à a prosa ma, prestu, a puesia s'hè imposta, purtendulu à circà lee trà e forme tradiziunali, a puesia cantata è a canzona oghjinca; è, l'ultimi anni, avia ancu fattu soie forme corte ch'ellu chjamava « cacci ».

E prime publicazioni sò quelle di a rivista Rigiru, in u 1974, in tempu di Riacquistu ; dopu ne veneranu altre, per indettu, U Spannamente (1980). Parechji testi, cantati da artisti isulani famosi, camineranu in a cultura pupulare di scena in dischettu è ci feranu ceppu. Di sti scritti sparnucciati, era venuta l'ora di fanne a racolta, arricchita da qualchì ineditu. Iniziatu da l'autore stessu, stu prugettu hè compiu oghje da i so figlioli.