Nutiziale culturale

Musa, a nuvella racolta puetica di Olivier Ancey, edizione Òmara

Hè esciuta a nuvella racolta puetica di Olivier Ancey. Attraversu a sensibilità linguistica è musicale, l’autore sfrutta l’amore vistichendu a rima trà u pueta è a so musa. Trà puesia corsa è tradizione literarie, offrenu e puesie un’opera prufonda è arradicata à a nostra lingua, aperta annantu à u mondu. Mischjendu sfarente forme di scrittura, a racolta dà una piazza impurtante à u sunettu, in particulare grazia à l’adattazione di parechji sunetti di William Shakespeare, è una seria di testi nant'à u tema di l'amore. Una custellazione d’influenze à prò di una puesia à tempu classica è cuntempuranea, purtata da una lingua ricca è musicale. 

Pueta, insignante di lingua è cultura corsa è autore di a racolta Tarra matre publicata in u 2010, Olivier Ancey hè cunnisciutu dinù pè e so numerose cullaburazione cù canterini è gruppi isulani. Cusì, a vucazione di parechji testi di Musa hè d'esse messa in musica, prulunghendu a leia prufonda trà puesia è canzona ind'a tradizione corsa. Cù stu libru, Òmara Edizione inaugureghja una nuvella cullezzione di puesie, dunque un spaziu di spressione à una scrittura à tempu arradicata in l'isula è aperta à e grande tradizione puetiche è europee.