Nutiziale culturale

Les réseaux européens de Neuhoff et Paoli, Michel Vergé-Franceschi, edizione Albiana

A Corsica è a Scozia anu caratteristiche cumune ancu s’elle sò luntane da parechje millaie di chilometri, separate da frunterie linguistiche, terrestre è marittime, erede da a storia è da a geografia. Trà i dui paesi, avemu leie persunale, famigliale, militare, pulitiche è ancu geopulitiche principiate à u XVIu seculu. N’avemu i primi indizi, in tempu di Sampieru Corsu è di a regina di Scozia Marie Stuart : difatti, corsi, frà elli u fratellu di Sampieru, sò à u serviziu di Marie Stuart. Dopu, rete si furmonu in u filu di u tempu, per via d’evenimenti pulitichi accaduti durante a storia di l’Europa è di u Mediterraniu, dapoi u Rinascimentu sin’à u seculu di i Lumi è di e rivuluzione. 

Ste rete, pè u più secrete postu chì dipendendu da e loghje massoniche, si fecenu cunnosce durante stonde maiò di a storia di a Corsica, durante « l’elezzione » di Teodoru di Neuhoff in u 1736, è dopu durante a rilazione cusì particulare di Pasquale Paoli cù a Scozia è i so « difensori di a Libertà » – cum’è James Boswell, scrittore è avucatu. Studiate dapoi più di vint’anni da Michel Vergé-Franceschi, ste rete sò pocu è micca cunnisciute in a storia di a Corsica. Dunque, l’autore ne prupone una lettura nova è argumentata.