Nutiziale culturale

Da a Casinca à Bastia sin’à Milanu : u prugettu bislingu Scambiu cità

Dapoi a classa di 6a, l’elevi bislingui di i cullegi Henri Tomasi di Fulelli è Simon-Vinciguerra di Bastia participeghjanu à u prugettu Scambiu cità-paese, una dimarchja pedagogica custruita à tempu da e squadre di i dui stabilimenti. Anne-Charlotte Luciani, Christelle Poggi, Camille Giudici, Emmanuelle Rossi, Nathalie Valentini è Enric Joffrion. In core di stu prugettu : a lingua corsa, veru filu cunduttore di i scambii trà l’elevi. Currispundenze scritte, pruduzzione spartute è travaglii cumuni anu permessu à l’elevi di parlà corsu in situazione cuncrete, fora di i so stabilimenti sculari. Stu travagliu s’hè cunstrutu nant’à duie tematiche maiò : l’acqua è l’architettura. L’elevi anu scupertu a cità di Bastia è u cullegiu Vinciguerra, a Castagniccia vicin’à un’architetta è studiatu e risorse in acque à u stagnu di Terrenzana, à l’acque d’Orezza è à a spiscia di Carchetu. Cù e materie SVT è a fisica-chimia, anu analisatu i fenomeni naturali è l’imbusche ambientale. Si sò sprimati in lingua corsa è in francese ; in talianu, anu apertu u so  sguardu versu l’internaziunale.

Dunque, un avvicinamentu glubale chì dà sensu à l’amparere. Dopu, u studiu di l’acqua è di l’architettura s’hè prulungatu sin’à a cità di Milanu pè capì megliu ciò ch’elli avianu vistu in Corsica. Anu scupertu in a cità taliana u Duomo, a so architettura tamanta è simbolica, i Navigli, famosi canali chì anu illustratu l’imbusche in leia cù a gestione di l’acqua in cità. Eppo, u museu di e scienze è di e tenniche li hà presentatu un avvicinamentu scientificu è interattivu di e nuzione travagliate in scola. Ci hè stata dinù a visita di u Bosco Verticale, esempiu emblematicu d’architettura à longu andà, illustrendu a manere d’integrà a vegetazione in core di a cità pè risponde à e sfide ambientale. 

Cusi, u prugettu Scambiu cità-paese permette à l’elevi di crucià e discipline è di dà sensu à e so amparere. Abbisogna cumpetenze scientifiche, linguistiche è culturale. Ghjè ancu un’apertura impurtante nant’à u mondu prufessiunale: certi scoprenu mistieri in leia cù l’ambiente, l’architettura o l’ingegneria. Stu viaghju in Milanu hè u risultatu d’un travagliu cullettivu cunduttu nant’à parechji anni, ma dinù una tappa maiò in u percorsu di l’elevi à tempu linguisticu, culturale è citadinu. Apre pruspettive pè a seguita cù a brama di pruseguela in l’anni à vene.

Origine : Corse net infos