Nutiziale culturale

'Soli di Parigi, Soleils de Paris', una racolta di puesia bislingua di Marianghjula Antonetti-Orsoni, edizione Casa di Arena

Un’opera publicata ind’a nova cullezzione intitulata « Piccula Casa », ch’hà da permette à Casa di Arena di publicà a puesia bislingua cù più o menu 4 racolte à l’annu. In  'Soli di Parigi- Soleils de Paris”, a lingua corsa sprime in versi famosi lochi parigini : Arcu di Trionfu, Torra Eiffel, Sacru Core, l’Opéra, a piazza Vendôme, Barbès, Porta San Diunisu, Piazza di a Republica cù belle illustrazione di sti lochi. Una lettura meravigliosa, una stonda squisita, originale, corsa è puetica in Parigi.

Marianghjula Antonetti-Orsoni hà insignatu è hà fattu assai ricerche nant’à a lingua corsa è a puesia. S’interessa dinù à u patrimoniu, a flora è a storia. Hè di u paese di Moltifau è ingrandata in Parigi cù genitori tramindui moltifinchi. Vultata in Corsica, hà seguitatu i Studii Corsi à l’università è ottene un DEA nant’à « U Parlà di Moltifau ». In u quadru di l’università d'estate, participeghja à l’attelli di scrittura animati da Ghjacumu Thiers chì l'incuragisce tandu à scrive puesie in corsu. 

Stallata in Bastia participeghja sempre oghje à parechje publicazione litterarie cullettive cum’è Raconti, Rigiru, Cismonte, Parulle di donne (CCU) o ancu Terres de femmes, a rivista numerica di puesia è di critica d'Angèle Paoli... Marianghjula Antonetti-Orsoni hà participatu dinù à u « Novu Atlante Linguisticu è Etnugraficu di a Corsica » travagliendu à tempu nant’à a flora isulana (Flora Corsicana) cù Marcelle Conrad. Omu a ritrova dinù in u libru « Arburi, arbe, arbigliule » cù Paul Simonpoli, un racolta di sapè pupulari nant’à e piante salvatiche in Corsica editatu nant’à u Parcu Naturale regiunale di a Corsica. In u 2023, hà ottenutu u Premiu di a Casa di a Puisia in lingua corsa.