Nutiziale culturale

Riedizione di 'Prighjuneri è altri nuvelli' di Marcu Biancarelli à l’edizione Omara

Sta racolta addunisce quattordeci nuvelle publicate trà l’anni 2000 è 2007. Si trovanu in trè racolte fundatrice chì, vicin’à i rumanzi “51 Pegasi” è “Murtoriu”, eranu a prima fasa di scrittura di Marcu Biancarelli. Sò opere bislingue tradutte in francese da Jérôme Ferrari, Didier Rey è Paul Desanti. Sti testi rinviviscenu grazia à sta nova edizione ritravagliata è arricchita. Entrenu in u secretu di l’anima umana scura, di a viulenza d’una sucetà induve si cunfondenu vittime è culpevuli cù un umurismu fora di u cuntestu. Scumudenti, lucidi, cù una mudernità chi surprende, Prighjuneri è altri nuvelli sò sempre d’attualità. Ste nuvelle marconu un’epuca di trasizione di a litteratura corsa induve s’emancipava a voce di u scrittore singulare Marcu Biancarelli.

Natu in u 1968, st’autore hè una di e voce maiò di a litteratura corsa cuntempuranea. Rumanzeru, nuvellistu, crunistu litterariu, hà publicatu ind’è Actes Sud è ind’a casa d’edizione Omara ch’ellu hà fundatu.