Nutiziale culturale

Corsica 1943, un associu chì priserva a memoria di a guerra

Creatu in u 2023 da un gruppu di passiunati di storia, l’associu Corsica 1943 face à prò di a trasmissione di u duvere di memoria in Corsica, in particulare pè e duie guerre mundiale. U so presidente hè Hermann Papillon. Trà intervenzione in e scole, participazione à e cumemurazione è nittera di i bunker di a Seconda Guerra mundiale. Un associu creatu da un gruppu d’amichi passiunati di storia, certi essendu cullezziunadori. Sò 35 membri d’Aiacciu, Purtivechju, Cervioni, Capicorsu è di u cuntinente. A principiu, s’addunianu pè fà cullezzione d’ogetti storichi. Facianu ricustituzione, ritratti in tenuta d’epuca. Dopu anu participatu à e Ghjurnate europee di u patrimoniu in u 2023 è invitati da u cunservadore di u museu di Bastia à participà à l’evenimentu in tenuta d’epuca, in più di a mostra nant’à a liberazione di l'isula. Corsica 1943 participeghja regularmente à e ceremonie ufficiale di cumemurazione è intervene in i stabilimenti sculari induv’ellu sà interessà l’elevi. Li anu presentatu ogetti, uniformi pè mustralli chì ci era un’altra vita cent’anni fà è chì tante persone ch’ùn avianu dumandatu nunda sò state chjamate è numerose ùn sò micca vultate. 

Dapoi parechji mesi, l’associu pulisce dinù i bunker custruiti da i taliani durante a seconda guerra mundiale cum’è sti dui esempiari custruiti in U Ponte à a Leccia. Custì, sò numerosi per via chì u paese era un nodu stradale è ferruviariu impurtante durante a guerra. Ghjè per quessa chì i Taliani, toccu l’annu 43, anu furtificatu U Ponte à a Leccia cù una decina di bunker. Sta nittera hè l’occasione di fà rinvivì a storia di u paese. N’avemu ancu in Belgudè, Teghjime, Lozari. I rispunsevuli di Corsica 1943 anu da pruvà à nittalli u più pussibule è dopu fà ghjunghje sculari in sti lochi. Esistenu d’altrò casamatte francese.