Nutiziale culturale

Jéromine Fedi conta l’anima di a Corsica in libri bislingui per a giuventù

In dui anni, sta giovana licenziata in arte è design di l’Università di Corsica hà publicatu cinque libri per a giuventù in corsu è francese nant’à e tradizione isulane è stonde di vita di u so paese di Carghjese. L’ogettivu hè di trasmetteli una cultura, un patrimoniu è una storia chì formanu l’identità è l’appartenenza. A tempu, ghjè un incuragimentu à leghje. A traduzzione in corsu hè di Cécile Aiazzi, studiante in lingua è cultura corsa in Corti. 

Da u primu libru “U Natale d’Andria” à “Andria è u trail di E trè torre”, Jéromine Fedi conta a vita oghjinca, valuriseghja u patrimoniu ingiru à u persunagiu d’Andria, un zitellucciu chì ingranda à u ritimu di a cultura, di e feste è di e tradizione. Sò libri di memoria è divertenti permettendu à i più giovani di scopre l’isula è a so lingua. L’impegnu di l’autora si ritrova dinù cum’è intervenante d’arte in i stabilimenti sculari è à u Spaziu di Carghjese induve prova à addunì a ghjente ingiru à prugetti cullettivi nant’à a cultura isulana.

U prossimu hè un cuncorsu induve i zitelli deveranu imaginà a cuprendula di u prossimu libru di Jéromine Fedi. St’ultima hà dinu u prugettu di creà, in cullaburazione cù Cécile Aiazzi, un libru nant’à i tupunimi, tradizione è persunalità di Carghjese. Cusì si cuntinueghja à trasmette i sapè venendu da e famiglie.