Nutiziale culturale

Una stazzona di 6000 anni scuperta vicin’à Filitosa

A scuperta di sta sepultura cullettiva hà permessu di truvà vistiche preziose cum’è e pignule è arnesi in ossidiana di Sardegna, qualchì ossu da analisà pè capì s’elli sò umani. Cusì, si ne sà ancu di più nant’à a preistoria isulana. Joseph Cesari, cunservadore di u patrimoniu è codirettore di i scavi, hà cunfirmatu l’impurtanza di sta scuperta : ghjè una stazzona di più o menu 6000 anni fà, induve e cumunità anziane venianu à dipusità i so morti. 

Si chjama u Musuleddu, (u chjucu musuleu) dunque un locu in leia cù a morte. Ci n’hè parechji in u Taravu è Valincu. Stu prugettu scientificu si pruseguerà in u 2027 cù l’accunsentu di a DRAC di Corsica è di u pruprietariu di u terrenu pè cuntinuà à documentà a storia di i megaliti isulani.