Nutiziale culturale

Tombe di u Neoliticu scuperte in Albertacce

In una settimana di scavi, da u 14 à u 18 di settembre, i cercadori di u LRA u Laburatoriu regiunale d'archeolugia (LRA) anu scupertu strutture funerarie in petra    , di 5000 anni fà, perioda di u Neoliticu. Sta scuperta deve permette di capì megliu l’organisazione di e cumunità di tandu. A direttrice di u LRA Hélène Paolini-Saez parla di teghje ingiru à una cascia funeraria capace d’accoglie una o ancu duie salme. Hè a prima volta chì una scuperta simule accade in Corsica. Ma ùn si sà cumu a persona hè interrata, in pusizione di ciucciu, o aggrunchjata, o allora sì solu l’osse sò poste. D’altrò, a zona hè stata cartugrafiata permettendu di scopre strutture simule, dunque altre sepulture pussibule. L’archeologhi cercanu à sapè cumu ste strutture sò state custruite è pensate. Una manera di documentassi nant’à a manera chì e donne è l’omi campavanu à quell’epuca in e muntagne è chì ghjera l’investimentu di a cumunità pè custruì stu generu di tombe induve sicuramente persone impurtante eranu interrate. Case si trovanu dinù à qualchì metru da u situ. Dunque, ci vole à sapè qualessa hè a perioda induve e case eranu cuntempuranee à e nostre tombe. 

Ma tutt’ognunu ùn hà micca una vucazione scientifica…Difatti, l’archeologhi si sò accorsi chì u situ era statu digià visitatu. Scavi clandestini sò stati fatti senza quadru scientificu nè autorisazione. Sta mancanza di rispettu nuce dinù à u travagliu archeologicu. Dopu a prima perioda di scavi, l’archeologhi volenu fà nove ricerche l’annu prossimu è forse scopre altre tombe o ancu valurisà u situ cù l’autorisazione di u pruprietariu in leia cù a CDC, a cumunità di cumune, è permette cusì visite guidate. Intantu, e petre ùn anu ancu palisatu i so secreti…