Nutiziale culturale

“L’énigme de Santa Restituta” di Michel Codaccioni, edizione Albiana

Stu libru conta una storia vera, un’enimma durante quasi 1600 anni in Calinzana ma chì cuncerna in fatti a Corsica sana. St’enimma oppone una credenza religiosa arradicata è un avvicinamentu di più prufanu di e tradizione pupulare. L’autore hà vulsutu scrive stu libru postu chì, in u 1951, u canonicu José Alberti hà trovu una parte di sta risposta à st’enimma nant’à u situ di Santa Restituta. Hà messu in risaltu a leia trà a credenza religiosa è a cunvinzione prufana. U so travagliu hà permessu d’accurdà duie visione spessu opposte. U libru di Michel Codaccioni presenta l’epupea di u canonicu Alberti. St’omu, da per ellu, cù pochi pochi mezi, hà riflettutu, fattu scavi è hà fattu qualcosa chì risplende oghje in a Corsica sana. Ma ùn si sapia ancu da induve venia Santa Restituta, chì ghjera stata a so vita, chì miraculi avia rialisatu ? Cumu era ghjunta in Corsica ? Chì sò l’indizii chì anu guidatu José Alberti ? Cusì, durante cinque anni, Michel Codaccioni hà vulsutu cumpletà sta storia. A memoria d’Alberti hà guidatu dinù à Codaccioni.

« L’énigme de Santa Restituta » hè in dinù in leia cù a vita di stu giurnalistu dapoi a so zitellina. A so mamma calinzaninca li cuntava a legenda di Santa Restituta. Dopu, s’hè amicatu cù u canonicu Alberti. Li hà cunfidatu parechji detaglii nant’à e so ricerche, ricordi ch’ellu avia appena sminticatu. Codaccioni hà fattu a prumessa di scrive stu libru à Charlotte Cuneo, amica di u canonicu, partuta à l’altru mondu à 104 anni. “L’énigme de Santa Restituta” hè dunque à tempu un travagliu di ricerca, un omagiu è una trasmissione. U prifaziu hè statu scrittu da u cardinale François-Xavier Bustillo.