Nutiziale culturale

Presentazione di Donne Torre, racolta di nuvelle di Marie Luce Calligari, in Zalana venneri u 24 di lugliu à 6 ore di sera piazz'à a Posta

A racolta di nuvelle di Marie-Luce Calligari à l’edizione Albiana-CCU. Un libru pè l’omaggiu d'una pueta à e 'Donne Torre', rampali è aggrotti à tempu, sempre in spigliu è pronte à da pettu à periculi, qual'hè ch'ùn ci videria ghjente di soiu.

Ghjente impastata di stalvatoghji, discursate o fole scritte nant'à u filu di e storie intese à veghja, populeghjanu ste nuvelle contendu scumesse di vite agradicate à un pezzatellu di locu: storia d'esse 'nantu à sè'.

Dicenu dinù a paura tremenda d'ùn esse più in sè, d'esce di u suminatu, di piglià i paesi, di mette à palesu ciò ch'hè cunvenutu d'ùn dì mai. 'Acqua in bocca'!

Spechji d'un mondu smarritu o imaginariu tramandatu, sti raconti di “Donne Torre” a li provanu à disciuplicà una cria certe cridenze o mendi oghjinchi.

Ponte trà eri è oghje, sta racolta fù intempiata da tante donne chjamate à impettà lotte, frastorni è inghjulie, pè dà è fà Vita, donne torre.

L’autore Marie-Luce Calligari, nata à l’entre di u 70, hè crisciuta in un paese di Castagniccia.

Prufessora di Lettere muderne è cursofona da sempre, marita u so amore di a literatura à quellu, assulutu, di a lingua corsa, in a so vita persunale, prufeziunale è creativa. Indiata in u sviluppu di l’insignamentu bislingu, prupone à i so elevi attelli di scrittura è ghjocu teatrale.

Da zitella scrive versi in lingua corsa è puesie di soiu sò state publicate in varie riviste literarie: «Esse un libru» in Musanostra #29 o «Asgiu» in L’éphémère 22, A casa di a puisia.

Ghjunghje à a scrittura in prosa in lu 2018 cù «Quella faldetta à farfalle», è vince u premiu Musanostra in lingua corsa 2019 cù «Tigru», una nuvella trà racontu di zitellina è contu fantasticu chì s’affianca à i misteri di u mazzerisimu.