Nutiziale culturale

U béhourd, trà sportu medievale è patrimoniu culturale

Stu sportu, in usu à u medievu cù armature, hè praticatu in Corsica da l’associ Cinarchesi Ad Aragona di Santa Lucia di Moriani è i Ranfioni Rucchisgiani d’Aiacciu. Joseph-Antoine Ciccoli hè u fundatore di u primu associu di béhourd isulanu. Stu prugettu hè natu in u 2023 cù Guillaume Armagnac. Essendu passiunati di storia medievale, participavanu digià à ricustituzione di ghjustre. Cusì hè natu i Cinarchesi Ad Aragona cù l’armature ispirate da Vincentello d’Istria, capu militare famosu è vicirè di Corsica sott’à l’autorità di u reame d’Aragone in u 1418. In quant’à Arrigo Della Rocca, u so ziu, hà ispiratu à David Diana, un aiaccinu di 26 anni. Hà fundatu i Ranfioni Rucchisigiani à a fine di u 2025.

Dapoi a creazione di sti dui associ, sti passiunati si ritrovanu pè allenamenti è riprisentazione ufficiale. Ma ùn impruviseghjanu micca. Portanu un’armatura pisendu quasi trenta chilò cù un elmu, un scudu, un petturale (plastron) è arme strazzunate in acciaiu. A disciplina si fonda nant’à parechje forme di lotta, u duellu trà duie persone, l’azzuffu da cinque à vinti cumbattanti è ogni tantu sin’à 500. Infine, u Pro Fight mischjendu cumbatti individuali è affruntamenti cullettivi in un stile chì s’assumiglia à u MMA è chì abbisogna strategia, tecnica è curagiu pè vince. E squadre corse di béhourd participeghjanu dinù à ghjustre nant’à u cuntinente dirette da a federazione francese di béhourd.

Fora di l’aspettu spurtivu, stu sportu porta una vera lascita culturale. I dui associ sò sullicitati pè rialisà ricustituzione cum’è à e Medievale di Livia. A tempu u béhourd mette in risaltu u patrimoniu feudale isulanu. In Corsica, esistenu parechje decine di signurie è quasi 300 furtificazione medievale trà l’ondecesimu è u sedecesimu seculu sott’à l’autorità di e Republiche di Pisa è di Genuva. L’isula hà pruduttu grandi guerrieri, in particulare i condottieri (i capi di l’armate di suldati prufessiunali) Ugo Colonna è Sampieru Corsu. Dunque, cù béhourd, sti cavalieri di i tempi muderni facenu rinvivì a storia medievale corsa. Cusì, ùn ferma micca in i libri.