Nutiziale culturale

« Le Dictionnaire des Bonifaciens et amis de Bonifacio » di François Canonici

François Canonici, anzianu capu d’agenza di i giurnali “Provençal Corse” è “La Corse” hè statu testimone di a vita d’un territoriu. Hè l’autore d’una vintina di libri nant’à Bunifaziu è u so rughjone, a vita, i mistieri, e tradizione bunifazinche. Cù stu novu dizziunariu, ricensa e casate d’ogni epuca è e famiglie in leia. 243 pagine cuntenendu 600 casate di donne è d’omi. Sò persunalità storiche, cuntempuranee, membri di a diaspora, o innamurati di Bunifaziu.

Sta creazione entre in u filu d’un travaglione di François Canonici pè priservà u patrimoniu immateriale di a so cità nativa. Fundatu nant’à archivii è testimunianze, prupone un ritrattu cullettivu di Bunifaziu da una generazione à l’altra. Altru chè un inventariu, ghjè un spechju di a memoria lucale, una leia trà passatu è presente. A tempu, ghjè un veru viaghju nant’à u patrimoniu è a storia d’una cità. L’autore hà scrittu dinù in particulare « Bonifacio d’antan : commerces, métiers et vie locale », « Dictionnaire historique et toponymique des villes et lieux-dits de Bonifacio » o « San Franzé de Bonifacio, l’histoire d’un quartier ».