Nutiziale culturale

'Un ghjornu, una canzona : una storia di u cantu corsu' di Marc’Andria Castellani

Marc’Andria Castellani, animatore à RCFM è attore culturale, conta a storia di u cantu corsu. Hè una manera di mette in risaltu i cuntesti di creazione di i canti pè una storia musicale di l’isula. Centinaie di canzone sò analisate. Si scopre, seguitendu u filu di st’analisi storicu, parechji stalvatoghji racolti vicin’à autori, cumpunidori o musicanti chì ci feranu viaghjà in u tempu. Cusì, omu puderà imaginassi ind’un campu di granu vicin’à Félix Quilici chì arrigistreghja “U cantu di a tribbiera”, nant’à un chjassu cantendu “I mulatteri d’Ulmetu” cù Micheli Poli, in Sermanu vicin’à Petru Guelfucci è i so amichi chì cantanu una paghjella, o ancu in Parigi in u 1981 daretu à a scena di u cuncertu di Canta u Populu Corsu.

L’opera serà dedicata : 

• A a libreria Papi in Bastia u 28 di nuvembre  à 4 ore è mezu

• A a FNAC di Furiani u 3 di dicembre à 3 ore

• A a cunfraternita di Belgudè u 6 di dicembre à a listessa ora

• A Praticalingua Bastia, carrughju Sant’Anghjuli u 17 à 3 ore

Marc’Andria Castellani hà rialisatu l’emissione « Un ghjornu, una canzona » è « Storia ». Hà cantatu in parechji gruppi è cullaburatu cù Petru Guelfucci, Jean-Paul Poletti, Canta 73, Balagna, Anghjula Potentini.