Nutiziale culturale

Ciuttata in core à i canyons à a Casa di e scienze in Bastia sin'à u 18 di lugliu 2026

L’omu navicheghja dapoi parechji millenarii in Mediterraniu. Eppuru, in fondu di stu mare ch’omu credia cunnosce, ci hè un mondu ch’ùn hà ancu palisatu i so secreti. I canyons sottumarini agrottanu tesori di diversità biologica. Sò prufonde inzecche chì nascenu à qualchì chilometru da a costa è ciottanu prestu versu l’abissi. A cosa s’assumiglianu i so paisagi prufondi è l’esseri chì ci campanu ? Pè sapenne di più, ci hà rispostu à sta dumanda a spedizione scientifica cundutta da l’anni 2008 à 2010. Si ritrova à a mostra “Ciuttata in core à i canyons”, fundata nant’à un percorsu di 300 m2, è cuncepita da l’uffiziu francese di a biodiversità è u parcu naziunale di e Calanche. Permette à tutt’ognunu di scopre a sperienza campata da l’omi è donne chì anu participatu à sta spedizione. 

U scopu hè di fà cunnosce i canyons è di prevene nant’à a necessità di prutegeli. Cù e fiure fatte durante e ciuttate, u visitadore diventa u testimone privilegiatu di e ricchezze in e prufundezze. Mudelli è mudellisazione in 3D ghjovanu à fà capì i fenomeni dinamichi chì ammaniscenu i canyons di u Capicorsu è chì inghjennanu una divizia di vita. In più, un laburatoriu vi permetterà di diventà un scientificu chì esamineghja e racolte d’elementi dopu a so missione. Infine, un aiutu à a visita hè dispunibule pè i più giovani da 5 à 7 anni. 

Ciuttata in core à i canyons, casa di e scienze in Bastia, Lupinu, carrughju Pierre è Marie Curie sin’à u 18 di lugliu. A casa di e scienze hè una struttura municipale pè fà cunnosce à tutti e scienze è a tecnulugia. Attelli, cunferenze, prughjezzione, mostre, evenimenti v’aspettanu.

Di più infurmazione nant’à https://casadiescenze.bastia.corsica/