Nutiziale culturale

A Cerca Paulina, libru cullettivu, edizione Albiana

Stu libru hè in u filu di a mostra di l’estate 2025 in Capicorsu pè i trè centu anni di Pasquale Paoli. L’Università di Corsica è l’Uffiziu di u turisimu di u Capicorsu v’anu prupostu una mostra cù l’opere di Julie Canarelli è di Yan Leandri in 12 cumune cù un ciculu di 15 cunferenze da u 27 di ghjugnu finu à u 31 d’agostu.

Caminu cumunu, a Cerca hè a prucessiò fatta u vennerì santu trà e chjappelle di u paese di Brandu. A cerca paulina vole annunzià paese à paese, per e sette chjappelle, a nascita di Pasquale Paoli, a figura a più maiò di a storia di a Corsica.

A cerca paulina hè u contrapuntu di a prucessiò urganizata a matina di u vennerì santu da i cunfratelli. Pelegrini trà e chjappelle, cantanu, preganu, tenenu u locu, in un ciculu ricuminciatu ogni annu. A cerca hè scuperta è memoria. Hè impegnu paisanu. Hè ligame trà u terraniu è u divinu, trà u sacru è u prufanu. Si face leia trà terra è celu.

A nostra cerca paulina hè dinù ri-cerca, cù l’idea di l’intrecciu di u sapè è di u creà. Avemu circatu l’impegnu paisanu, a participazione, l’empowerment. « Learning by doing » dicia John Dewey. Pensemu cun ellu ch’ellu tesse l’esse l’appaspà. A cerca pò esse l’impegnu di tutte è di tutti. Cridenti è cridenti micca in giru à un rituale cullettivu. Al di là di e sfarente cullaburazione istituziunale, si vole esse participativu u prugettu, cù l’impegnu di i paisani per i ritratti, cù e cunferenze date in i paesi, cù l’aiutu datu ci per e stallazione per circà à lià ghjente, tempi è lochi. Da a seanza di ritratti, da a scelta di i lochi à a stallazione di i ritratti in e chjappelle è i lochi di e mostre, femu scumessa di dà bisognu di sapè, di trapassà e ripresentazione mitulogiche di Pasquale Paoli. In lochi di racolta di a dumanda turistica ambientale, femu scumessa di l’interessu di a ghjente per u nostru patrimoniu storicu è culturale. Spessu cunflittuale, ci pare esse una risorsa sucetale in una cumunità mediterranea in cerca d’arradichere.

A cerca paulina sposta in e chjappelle si vole esse accolta di Paoli à fiancu à u Cristu cruciffissatu, da tantu ch’ellu hè sacralizatu in Corsica. Hè ricunniscenza è celebrazione di a so nascita. Interrugheghja dinù e rilazione passate è oghjinche trà u putere religiosu è u putere puliticu, trà laicità è cerca di sensu. Si sà quantu elle sò state sustenute da a Chjesgia e Rivuluzione di Corsica. Pensemu quì à u primu Rettore di l’Università di Corsica Francesco Antonio Mariani, à Giulio Matteo Natali l’autore di u Disinganno, à Don Gregoriu Salvini, l’autore di u librone di a Ghjustificazione, passendu per Bonfiglio Guelfucci, u prufessore di teulugia, cumpagnu fidu fidu di Paoli. I Lumi di Paoli sò dinù illuminazione di è da a Chjesgia ?

Cusì, a nostra pruposta di Cerca paulina invita à un pelerinaghju in a storia corsa, cum’è una strada versu u sacru paulinu, figura tutelaria universale, di tutte è di tutti, quant’è di a nostra Università. 

A mostra prupone d’andà à a cerca di i passi paulisti, in Corsica è in Inghilterra, in fiure è in videò, cù tante cunferenze nant’à i lochi di e mostre è un libru d’inchjostru stampatu chì hè statu publicatu à l’edizione Albiana.