Nutiziale culturale

'U tempu và, u tempu corre', un libru in omagiu à Marcellu Acquaviva di Jean-Jacques Poli è Santu Massiani

Jean-Jacques Poli è Santu Massiani anu scrittu st’opera chì rammenta a vita prufessiunale è artistica di Marcellu Acquaviva, prufessore, cunsiglieru pedagogicu di lingua è cultura corsa, autore è parullaghju di I Muvrini. Si n’hè andatu à l’altru mondu in u 2020 à 79 anni. Era di u paese di Lozzi è aduttatu in Balagna. St’omagiu di a prufessione mette in risaltu u talentu di u puetu è a so lascita culturale. 

L’idea di stu libru hè nata da una discussione trà Santu Massiani è Marie-Noëlle Acquaviva, a so moglia. L’autri anu racoltu i so scritti, testi, canzone, ind’a prima parte di u libru. Dopu, testimunianze di i so culleghi o in u privatu arricchiscenu l’opera. Da quelli chì anu travagliatu cun ellu, chì l'anu cunnisciutu bè. Chì anu misuratu u valore di a so lascita. Chì vulianu testimunià di u so essere prufondu, di a so umilità, di a so intelligenza, di a so cuntribuzione immensa à favore di l'amparera di a lingua corsa à a scola, è aldilà di a puesia scritta è cantata.. Marcellu Acquaviva hè statu precursore di l’insignamentu bislingu. Jean-Jacques Poli è Santu Massiani anu travagliatu cun ellu nant’à arnesi pedagogichi. facia parte di i primi cù Ghjuvan'Teramu Rocchi à inizià e metudulugie pedagogiche per fà amparà a lingua nustrale à i zitelli ind'e scole di i paesi quande nimu o guasgi nimu ci cridia.

U libru 'U tempu và, u tempu corre' hè ancu una testimunianza di stu travagliu è di st’epuca. Acquaviva vulia sempre difende a lingua è sviluppà a so amparera. Hè statu un puntellu di u Riacquistu. 

Da u so Niolu è a so Balagna tant'amati, passendu per Bastia, l'Algeria...cuntendu a so arradichera in lu veculu di l'usi è faccendi pastureschi, cù l'affizzione è a sulidarità famigliale.

Di u militante, 

Di u tercanu ch'ellu fù,

 Chì mai un ci ne scordimu !