Nutiziale culturale

Liv.corsica, l’intelligenza artificiale chì ampara da quelli chì parlanu u corsu

Creata in Calvi, l’intelligenza artificiale LIV, creata da Romain Deceuninck,  intrapresariu è artistu, Lucas Marie, ingegneru, è Sébastien Lomellini, cunsiglieru numericu pedagogicu, hè un arnese numericu di lingua corsa à prò di i Corsi, maiò è zitelli, pè a so amparera, valurisazione è pè esse migliuratu. Cusì, u numericu hè una furtuna pè e lingue in periculu è à tempu l’isula face entre i so codici culturali è linguistichi in a rivuluzione di l’intelligenza artificiale. LIV ghjè a 'Lingua Intelligente Virtuale” chì hà ottenutu a ricunniscenza ufficiale di l’UNESCO. St’arnese si scumparte in parechje entità adattate à i sfarenti usi di a lingua. Veru assistente numericu, capisce, tratta è trasmette in corsu, risponde à quistione di storia o di cultura, o ancu prupone puemi è testi adatti.

A versione sculare hè digià aduprata da 1500 sculari in cullaburazione cun u retturatu, a versione “Squadra corsa” permette à tutti di trasmette, curege è rifinì u so parlà. Cusì, LIV si migliureghja pianu pianu è st’arnese ghjova à parlà corsu senza paura di u sbagliu perchè, cum’ellu si si dice, u corsu hè megliu à parlallu male chè à un parlallu micca. Iscrivite puru è curregite si ci hè bisognu.