Nutiziale culturale

'Sur les traces de Rinuccio Della Rocca, di Vannina Marchi Van Cauwelaert', Marie-Josée Forconi, Chantal de Peretti è Emilie Tomas, edizione Albiana

Rinuccio della Rocca (versu 1450-1511) hè l’ultimu signore d’un territoriu chì si stende da a bocca di Cilaccia à Bunifaziu. Hè un persunagiu emblematicu di u medievu corsu. Hè sempre vivu in a memoria pupulare, i paisaghji è tupunimi di u Pumonte. A so storia hè quella d’un eroe tragicu. À l’iniziu era alliatu di i Genuvesi contr’à Giampaolo di Leca ma dopu diventava u so nemicu à parte da u 1502. A so rivolta, da a Sardegna à a muntagna di Cagna, induv’ellu fubbe tombu in u 1511, durò una decennia. Sta perioda li permettia d’entre in a storia di l’isula à un’epuca di trasizione da a Corsica di i signori à quella genuvese, da u Medievu à u Rinascimentu. Sò numerosi i lochi chì parlanu di Rinuccio è e tracce archeologiche, d’archivii, artistiche chì schjariscenu a so epuca à cinque seculi di distanza. 

In stu libru, u lettore ciotta in un’epuca medievale spessu pocu cunnisciuta, cun a participazione di i migliori specialisti. Rinuccio della Rocca si ritrova in cunventu San Francescu di Santa Lucia di  Tallà, e ruvine di u castellu di Baricini in Sartè, in e tracce toponomiche, cum’è u casteddu è u pianu d’Ornucciu à u Cuscionu, a so memoria ferma in l’imaginariu medievale di a Rocca. Hè u solu signore corsu chì u so nome hè sempre presente in u territoriu è i paisaghji.