Nutiziale culturale

La Storia Patria ou l’Amour de la Patrie, nouvelles corses du XIXe siècle à l’edizione Albiana

Sti quattru scrittori anu campatu ind’a prima metà di u XIXu seculu. Anu tenutu caru a so isula è scrivianu in lingua taliana. Eranu i quattru tercani di a litteratura di tandu. 

A trentina di nuvelle addunite quì hè a prima mossa litteraria corsa. U so ogettivu hè d’offre à i lettori corsi o nò l’occasione di cunnosce a cultura è e tradizione immemuriale di l’isula. A tempu d’opponesi à a francisazione di e mentalità è rammentassi chì a « patria » avia una Storia à trasmette grazia à ste belle storie à cuntà.

Hyacinthe Yvia-Croce, in a so Antolugia di i scrittori corsi, evucheghja i scrittori di La storia patria. Dice di Regulus Carlotti : passiunatu di u so paese, assai primurosu di u gluriosu patrimoniu intellettuale è murale di a nostra razza, hà vulsutu scrivendu è parlendu discità in certi cori addurmentati u patriuttismu corsu puru è migliurà a sorte misera di e pupulazione isulane travagliadore.

Di Giovan Vito Grimaldi: Ste Novelle storiche corse ponu esse classificate frà i libri chì, grazia à u so stile è caratteri, onoreghjanu u so autore è quelli chì l’ispironu. 

Di Francesco Ottaviano Renucci : Storicu sapiente è cuntadore piacevule è istruttivu. Ghjè una bella cuscenza è l’onestità hè a marca essenziale di u so bellu talente. 

Infine, di Salvatore Viale, hè altru chè un gran puetu eroi-comicu. Hè un veru scrittore di prima trinca, u più famosu di i nostri scrittori in lingua taliana. Un puetu puru è fremente, prusatore elegante è criticu maestru. Via, un grande scrittore chì onoreghja a Corsica.