Nutiziale culturale

U parlà pumuntincu messu in risaltu nant’à u situ di Zonza Santa Lucia

A cumuna di Zonza Santa Lucia hà cullaburatu cù l’intrapresa Puntu Comu è u prufessore di lingua corsa Didier Guerra pè creà una banca di dati lessicali è linguistichi nant’à https://www.zonzasantalucia.corsica/. Ghjè una cullezzione cuntenendu 4 vulumi chjamata à evuluà : iniziazione à a lingua ind’a vita d’ogni ghjornu, immersione in a cultura viva di a cumuna (e feste, a litteratura, i canti, u teatru, u museu), apertura versu risorse scientifiche è storiche isulane è chjama à a ghjente pè arricchì u lessicu di parolle, spressione, raconti, puesie.

In sta cullezzione, ci truvemu testi, dialoghi arrigistrati, arnesi da telecaricà fundati nant’à u vucabulariu, a tupunimia di Zonza è Santa Lucia. A grammatica ùn hè micca sminticata. I sfarenti articuli seranu arricchiti in leia cù l’evenimenti cum’è a festa di u sportu, e feste Natalesche. Dunque, un arnese pè i principianti cum’è i cunfirmati, pè quelli chì sanu parlà corsu ma chì anu a paura di parlallu.