Nutiziale culturale

A chjama à i pueti di a A Casa di a Puisia sin'à u primu di marzu à mezanotte

In u quadru di u vintottesimu veranu di i pueti, “A Casa di a Puisia”, presidata da Norbert Paganelli, manda una nova chjama à i pueti pè scrive testi sta volta nant’à u tema di a Libertà in corsu o in francese. I participanti anu sin’à u primu di marzu à mezanotte pè mandalli à casadiapuisia@laposte.net Mandate obligatoriamente cù u furmatu word, in caratteri Times New Roman è senza francà una pagina. Ùn vi scurdate di mintuà indirizzi pustale, elettronicu è numeru di telefunu. Una ghjuria si prununzierà nant’à testi senza sapè quale sò l’autori.

Hà da attribuì un premiu pè l’opere in lingua corsa, un altru pè quelle in lingua francese, è infine unu pè i giovani scrittori d’avvene. Ogni vincidore riceverà un’opera d’arte è i migliori testi seranu publicati in un’antolugia. Sta chjama à testi di a Casa di a Puisia hè l’occasione di fà cunnosce novi talenti, ricumpensà a creatività è cuntribuì à a prumuzione di a puesia.