Nutiziale culturale

Lit'urale-Piscadori, da L'Agriate à Scandula : Des hommes entre terre et mer, di Muriel Poli è Isabelle Istria à l’edizione Alain Piazzola

Chì ghjè a lascita di a pesca tradiziunale corsa oghje ghjornu ? Stu novu libru conta a vita di l'ultimi piscadori custieri, attori d'una pratica antica oghje quasi sparita nant'à una grande parte di u litturale occidentale di l'isula. Ghjente di mare cù u campà assai influenzatu da l'elementu acquaghjolu è e cundizione naturale, ogni tantu assai difficiule. Anu dinù pratiche suciale ricche pè appruntà u materiale è u travagliu nant'à a barca, u cumerciu, i riti è una sulidarità permanente nant'à a terra cum'è in mare. 

L'autori anu vulsutu mette in risaltu l'ingegnusità di i piscadori. Capaci à identificà senza strumentu particulare i punti d'interessi pè a navigazione, sanu dinù caccià u fattu soiu da e risorse pè u manghjà è pè u so artigianatu. U libru hè illustratu da carte, disegni, acquarelle di Isabelle Istria pè facci entre ind'un mondu di gesti, di paisaghji, di spressione è di scontri.