Nutiziale culturale

Chjama à prugetti di a CDC : lingua corsa è natura sin'à u 15 di maghju

A Cullettività di Corsica face dapoi parechji anni una pulitica linguistica pè sparghje u bislinguismu. L’ogettivi è l’azzione si fondanu in particulare nant’à a migliuranza di l’insignamentu in u primu è u secondu gradi è dinù nant’à l’allarghera di e misure digià pruposte. Vistu u successu di i centri di seghjorni è di studii corsi, chì anu inghjennatu prugetti cù a mutivazione è l’impegnu di l’insignanti è di l’elevi, a CDC hà decisu oramai una chjama à prugetti pedagogichi in lingua corsa adatti à i livelli è à i prugrammi sculari in cullaburazione cù u Parcu Naturale Regiunale di Corsica.

Sta pulitica d’educazione à l’ambiente in immersione linguistica ghjova à cunnosce megliu l’ambiente naturale di a Corsica è à tempu favurisà l’impegnu d’ognunu è di tutti à prò di u sviluppu à longu andà è, da l’altra banda, di generalisà i seghjorni in immersione linguistica. L’ogettivu hè di fà azzione educative cuerente è strutturate in immersione linguistica, custruite trà cullaburadori chì i prugetti rispondenu à l’imbusche linguistiche è naturaliste di a CDC.

Sin’à u 15 maghju, si pò telecaricà e chjame à prugetti di u primu è u secondu gradu è cunnosce tutte l’infurmazione nant'à https://www.isula.corsica.