Nutiziale culturale

I 170 anni di l’acque d’Orezza festighjati venneri u 24 d’aprile

Un’istituzione isulana s’appronta à suffià e so 170 candele. Sì e virtù di a surgente di Rapaghju eranu digià cunnisciute da i Rumani, un decretu ministeriale di u 25 d’aprile di u 1856 hà autorisatu ufficialmente u so sfruttamentu. Ricunnisciuta d'utilità publica in u 1866 in tempu di Napulione III, st’acqua acitosa naturale cuntene assai assai ferru è avia fattu di a Castagniccia una stazione termale prezzata da l'aristucrazia. Veru rimediu contr’à l'anemia, l’acqua d'Orezza fù ancu mandata à i suldati di a Seconda Guerra mundiale. Dopu avè mancatu di sparì in l’anni novanta, hè rinata magnificamente pè diventà un’imbasciatrice internaziunale di a Corsica. D’altrò, stu venneri 24 d’aprile, u passatu ùn serà micca solu à l’onore postu chì st’anniversariu hè una tappa decisiva in a storia di a surgente cù l’ufficialisazione di a SCIC (Sucetà Cuuperativa d'Interessu Cullettivu). Stu mudellu ecunomicu innuvante è participativu ghjova à piazzà u territoriu, i so abitanti è i so attori lucali in core di u sviluppu di l’intrapresa. 

U prugramma di u 170u anniversariu hè previstu pè valurisà e forze vive di a valle. Si tene nant’à u situ storicu di a surgente in Rapaghju à parte da 2 ore è mezu. Una ghjurnata di festività cù artigianatu, musica, patrimoniu. Si puderà scopre e cascette “170 anni” in edizione limitata. Canteranu i zitelli di a scola corsa di Biguglia, guidati da Ceccè Brunini, Felì Travaglini è l’elevi di Scola In Festa, u gruppu I Pignotti. L’autora Lili Pissenlit hà da animà attelli creativi : in stu quadru i zitelli rialiseranu una mostra nant’à l’epupea d’una bullisgina chì viaghja da a muntagna sin’à a bocca. Infine, participeranu l’artigiani lucali : ghjuvellieri, spurtaghji, pruduttori di robba purcina, licori è tant’altri.