Nutiziale culturale

U coru d’omi di Sartè : 30 anni

U coru d’omi fundatu in u 1995 da Jean-Paul Poletti hè una vera istituzione di a musica isulana. U famosu canterinu hè accumpagnatu da i fratelli Jacques è Jean-Claude Tramoni, Jean-Louis Blaineau, Stéphane Paganelli è Ceccè Lanfranchi. Cantanu in e chjese è catedrale di Corsica è d’altrò pè fà sente a cultura corsa, a so tradizione è spiritualità. I so cuncerti trasmettenu un messagiu universale : a musica hè un linguaghju chì leia e culture è e generazione. U coru hè fidu à e so radiche è scopre nove territorii. Praticheghja a pulifunia tradiziunale corsa, franciscana, u ripertoriu sacru. Sprime un “arte umile è bellu, bramosu di perfezzione”. In u so ripertoriu, avemu soprattuttu creazione. Pè a pulifunia franciscana è u ripertoriu sacru, u coru face rinvivì un fondu millenariu, per esempiu quellu di u patre Ulrich, di u cunventu San Damianu in Sartè. 

In u 2019, hà creatu “U Catinacciu di Sartè” cù u coru di a cunfraterna di sta cità è u gruppu pulifonicu Pumonti. Avemu 17 canti pulifonichi pè un omagiu à sta prucessiò di u Venneri santu. L’opera hè stata l’occasione di cuncerti in Corsica è di a publicazione d’un dischettu 'U Catinacciu di Sartè'.

I prugetti di cullaburazione di u coru d’omi, cum’è quellu cù u capu d’orchestru Jean-Christophe Spinosi, sò testimonii di a so dinamica creativa. Cullabureghja dinù cù u festivale Sacra musica. St’evenimentu ricerca cori chì anu un’anima. U so ogettivu, grazia à a musica cum’è linguaghju universale, hè di parlà di a bellezza di u mondu è di speranza. Durante cuncerti di stu festivale, candele lucenu ind’e catedrale. Secondu unu di i so fundatori, Jean-Baptiste Brejon, u coru d’omi di Sartè cunnosce da veru a musica sacra è hà un’identità forte. Travaglia nant’à partizione originale, antiche. Si sente l’anima di a Corsica in ellu.