Nutiziale culturale

'Un dischettu par tutti' : un prughjettu novu à prò di e persone svantagiate

L’associu « Tous pour chacun », gestitu da Wandis Le Hui, travaglia, cù artisti corsi è d’altrò, nantu à un prughjettu di dischettu. U scopu hè di racoglie mezi per l’associu ma sopratuttu di scambià u sguardu nantu à persone svantagiate.

Comu fà per ristablisce a parità cù e persone svantagiate ind’a nostra sucetà ? A questione merita d’esse posta. È s’ella tocca à pulitichi di favurizà un sguardu novu nantu à isse persone quì, di fà chì ognunu deve campà cù a so particularità, ci sò ghjente è associ chì travaglianu in u so scornu per fà scambià e cose. « Tous pour chacun », natu in u 2018, ne face parte. Gestitu da Wandis le Hui, issa struttura t’hà a particularità d’avè vinti persone svantagiate in u so cunsigliu d’amministrazione. « Avemu parechje missione, spiega Wandis Le Hui, sensibilizà a ghjente, favurizà l’inclusione d’issa populazione, travaglià nantu à prughjetti chì permetterianu di scambià u sguardu ch’è omu hà nantu à isse persone... »

Per risponde à isse missione, l’associu hà vulsutu travaglià nantu à una strategia precisa. Un travagliu messu in piazza ghjust’à puntu cù u cunsigliu d’amministrazione. Cusì, hè natu un prughjettu di dischettu chì, ci vole à dilla, avanza abbastanza bè.

« Avemu subbitu avutu l’accordu di u cumpunitore Pon, cumpare di u dischettu, aghjusta u capimachja di l’associu, à pocu à pocu, l’idea face a so strada, per sbuccà, speremu, nantu à un dischettu da quì à un annu. »

Parechji artisti francesi è stranieri sò dighjà stati cuntattati. Si tratta di Grand Corps Malade, Soprano, d’un artistu belgiu autistu chì hà datu u so accunsentu per una di e so canzone in u dischettu. « Avemu dinò, unu di i musicanti di Cabrel chì hè prontu à participà. »

L’idea hè d’allargà u prughjettu aldilà di a Corsica ma, di sicuru, di fà chè i nostri artisti pudessinu mette a so grinfia nantu à issu dischettu. Nantu à stu puntu quì, Antò Secondi, capimachja di u gruppu « Svegliu d’Isula », membru di l’associu, toccu direttamente, s’hè impegnatu. « Wandis m’hà prupostu d’aiutà lu nantu iss’idea quì, preciseghja l’artistu, parlà di a tematica di i svantagiati mi pari impurtanti par via di u sguardu ch’edda t’hà a ghjenti nantu à issi parsoni. Ci voli à fà scambià issu sguardu è ghjè unu di i scopi d’issu prughjettu. »

Un cuncettu hè abbastanza simplice : ogni artistu o persona, pocu impreme s’ella face parte o nò d’una struttura, pò scrive un testu è cumpone una canzona nantu à issa tematica quì. Tutte l’influenze ponu esse aduprate da u rock à u folk passendu per u reggae, u tradiziunale o u rap. Hè listessu per ciò chì tocca à e lingue : corsu, francese, talianu, spagnolu, inglese…L’artisti ponu fà u registramentu da per ellu o travaglià cù un studiò (un cuntattu serà fattu in issu sensu quì cù strutture corse...)

« U nosciu scopu, aghjusta Anthò Secondi, hè d’avè rizorzi finanziari par fà avanzà l’associu in i so missioni, ma dinò di apri a ghjenti nantu à a realità di ciò ch’eddi campani issa ghjenti. U sguardu cumencia à scambià. Semi passati da a « pietà » à un sguardu novu, ma ùn basta micca. U scopu hè di pudè viaghjà tutti insemi, ognunu cù a so particularità. »

U cuntattu s’hè apertu cù artisti corsi. Pierre Agostinetti hà dighjà datu u so accunsentu per participà è s’aspettanu e risposte da altri. Risposte ch’ùn tarderanu micca.

« Un dischettu par tutti » divaria esse prontu per u principiu di l’annu 2023. Nanzu à una fasa di cummercialisazione è à tempu di sensibilisazione. L’artisti corsi s’anu da, forse, impegnà à prò d’una tematica chì ci tocca tutti.

Origine : Giurnale di a Corsica