Nutiziale culturale

A mostra 'Méditerranéennes, ritratti di donne' à u museu di a Corsica in Corti prulungata sin'à u 15 di marzu di u 2025

Sin’à u 15 di marzu di u 2025, sta mostra presenta ritratti di donne in Mediterraniu venendu pè u più da e cullezzione di u Centru mediterraniu di u ritrattu. L’evenimentu entre ind’una tematica cumuna di mostre in i musei di a CDC pè a perioda 2024-2025 sott’à u titulu genericu “Donne di Corsica”. In stu filu, avemu e Vénus di a prestoria à u museu di Livia, i ghjuvelli di e donne di l’Antichità in Aleria, Maria Cosway, a donna di e Luce in Merusaglia, Femin’Isula in Corti. E donne sò dunque à l’onore in i musei di Corsica è ghjè nurmale. Anu participatu à a Storia è à i grandi cumbattiti cuntempuranei. Ùn ci scurdemu quantunque di a Donna di Bunifaziu è di quella di Capula, e numerose tombe etrusche d’Aleria, Danielle Casanova è altre resistante cose.

Ci vole à esce da a donna corsa riprisentata da Colomba, da sta riprisentazione in leia cù a morte, a vindetta o da a donna di casa mamma allevendu i so figlioli è basta. A storia ci mostra digià ch’elle anu participatu à e rivuluzione è e crise, ch’elle anu scumbattutu contr’à un destinu decisu da l’omi. Parechje anu mustratu ciò ch’elli sò u curagiu è u prezzu di a libertà. I ritratti di a mostra “ Méditerranéennes” rimandanu tutte st’emuzione, sti sintimi. L’opere anu un filu crunulogicu, da l’invenzione di u ritrattu à l’epuca cuntempuranea. Hè dinù un cunfrontu trà e generazione. I ritratti di u 19u seculu è di u principiu di u vintesimu sò di punta à quelli di l’annu 2000. U scopu hè di creà una risunanza trà l’epuche, i stili, e tenniche di ritrattu, a vita d’ogni ghjornu di ste donne ritrattate. Un avemu micca solu donne corse ma ancu mediterranie. A mostra presenta dinù a visione d’artisti internaziunali è a so idea di a donna mediterrania, a pruspettiva di a Corsica è di u Mediterraniu vista da l’apparechji d’artisti feminili. Infine, ghjè un’intruduzzione à a grande mostra intitulata Femin’Isula prevista à u veranu 2025.