Nutiziale culturale

I Voci di a Gravona in cuncertu in Biguglia venneri u 13 di marzu

U gruppu, creatu in l’anni ottanta, s’appronta à una serata à u centru culturale Carlu Rocchi à parte da 8 ore è mezu. Un militantismu culturale discretu è sinceru è sempre u scopu di trasmette cun umilità a lingua è a cultura grazia à u cantu. Volenu fà cuncerti l’annu sanu, una quindecina, è micca solu l’estate. Ùn sò micca prufessiunali ma amatori, passiunati è militanti pè difende a creazione, a lingua è a cultura. Anu una forte amicizia trà di elli. Volenu fà entre dinù a giuventù cù a so scola di cantu. I giovani in stu gruppu ci cantanu dapoi ch’elli anu 7 o 8 anni.

In tuttu, 5 musicanti è 9 canterini seranu stu venneri à u spaziu Carlu Rocchi di Biguglia. In più di e nove creazione, u publicu aspetterà e famose canzone E po marchjà, Sucetà, Spaventu o Quand’eddi m’accurdarani, chì anu marcatu a vita di u gruppu è quella di i passiunati di musica. A scola di cantu Cas'Arcusgi canterà in prima parte. Si pò cumprà i biglietti nant’à corsebillet.co