Nutiziale culturale

Alchimia, novu dischettu di u gruppu Contraversu

Strada facendu, una struttura nasce ma « Tonton » hè appena luntanu. Tandu, u « Ziu » riesce à mette in piazza una « squadra », cumposta d’artisti rinumati o micca. « Nono » Vidal à a batteria, un anzianu di Canta u Populu Corsu, « Mister Doom », Dumenicu Tomasi, prufessore d’inglese ,passiunatu di rock (ghitarra bassa) è un ghjovanu chì dapoi, hà fattu a so strada, ellu dinò : Marcantò Mucchielli « the Kid » (ghitarra).

È di fattu, u gruppu, induve « Tonton » affaccava di tantu in tantu – ch’ellu hè impegnatu in parechji prughjetti- s’hè fattu cunnosce. Scene (l’aghja), rete suciale... Eppo ci hè statu a crisa sanitaria chì hà custrettu a struttura à calà appena u ritimu di travagliu. Frà tempu, postu ch’elli sò cinque cum’è i diti di a manu, ci ne vulia un altru. Tandu, « Ziu », cunvince Stefanu Pinelli, specialistu di Busucchì è passiunatu di Folk-rock.

À dilla franca, ùn semu tanti surpresi di vedeli esce u so primu dischettu. Ne mancu e canzone scelte, dighjà intese nantu à e scene isulane è dinò e rete suciale è ancu in a citadella d’Aiacciu. « Saria a seguita di u nosciu parcorsu, spieganu i so membri, avemi travaddatu nantu à issu prughjettu è issa musica chì ci currispondi. »

Tandu, hè esciutu « Alchimia », una decina di canzone, un mischiu di tradiziunale à modu soiu « Pitriculella », « Lisa Bedda », di creazione chì trattanu di tutti i sughjetti ma particulari quantunque. Cusì, si pò truvà « Torino 77 » un umagiu à a famosa vittoria di u Sporting in Torino (3-2), « Una parolla », cumposta da Michele Solinas nantu à un scrittu appena spirituale di Petru Canon (si tratta di San Ghjuvà è d’una parolla « persa ») è ancu John Ryan’s Polka, un tradiziunale adattatu da Dumè Tomasi o « A canzona di Jesse James (sempre u paghju Solinas-Tomasi scrittu è musica).

Oghje, u contraversu saria, s’ellu ci vulia à dà ne una definizione, un sonu, un estru è una musica particulari, qualcosa c’ùn si ritrova micca altrò, ma sempre una leia cù u spiritu di « I cantelli » è un’uchjata à « The Pogues ». Un dischettu assai aspettatu induve Davide Baglietto, sunadore di caramusa hà participatu. L’avvene ? « Emu da circà à girà iss’istatina s’è i cundizioni u parmettani, eppo cuntinuà à travaddà... »

U gruppu chì face a so strada è chì un soffiu novu à u rock nustrale…

Infurmazione : journal de la corse.corsica