Nutiziale culturale

Bastia, dicenu a soia

Ghjè un viaghju fotograficu ind’un Bastia silenziosu. Una specia d’immersione nant’à sta cità sott’à un angulu spessu scunnisciutu. Cù stu libru chì u titulu rimanda à l’emissione “Dite a vostra” presentata da Ghjuvan’Carlu Marsily nant’à RCFM, l’autore lascia l’onde pè a maghjina. 360 ritratti fatti pè u più durante u cunfinamentu di u 2020 pè presentà un Bastia micca sempre cunnisciutu. U risultatu di dui anni di riflessione ma dinù di a passione pè l’imaghjina nata in tempu di l’aduliscenza. Ghjuvan’CArlu conta chì u so interessu ricolla à una quarantina d’anni fà. Era giovanu quandu un cullegu di u so babbu l’hà fattu  scopre un laburatoriu di ritrattu è hà manighjatu u so primu apparechju fotografficu. Cusì hè nata sta passione pè a fiura è l’inquadratura chì l’anu fattu rializà parechji documentarii audiovisivi dapoi 25 anni. I ritratti di stu libru, l’autore ùn hà micca vulsutu presentalli durante una bella stonda, ma ghjè Fabrice Fenouillère, u direttore di u Parcu Galea, chì l’hà cunvinti di presentalli. Da i carrughji in labirintu di a citadella à e strette di u Vechju portu passendu pè l’architettura di L’Aldilonda, avemu una vera spassighjata fotograffica trà i muri muti di a cità induve campanu inseme u mudernu è l’anzianu. Ogni ritrattu hà a so storia è porta a marca di quellu chì tene l’ogettivu. Certi sò stati rimanighjati perchè Marsily hà vulsutu dà un stile persunale, à a fruntiera di u ritrattu è di a pittura. Sin’à u 20 di ghjennaghju, si pò fighjà dinù a so girandulata artistica cù unepochi di raconti à u centru L’Alboru.

Pè cuntà u so viaghju fotograficu, l’autore hà racoltu una centinaia di testimunianze di persunalità, artisti, attori culturali o pulitichi chì contanu, ogni tantu nant’à u tonu di a cunfessione è ricordi, una stonda di a so storia intima cù a cità. Tutti palesanu u so amore, a so passione per a capitale di u Cismonte. Sti testi sò luminati da e fotografìe di Ghjuvan Carlu Marsily. Una puesia di maghjine è di culori, induve schjatta a bellezza di a cità. Marsily sculpisce i lochi di Bastìa, face sente l’anima di i so viculi, di e so strette. U so ochju d’artistu trascende i casali citadini, chì diventanu cusì palazzi à l’aria di Venezia. Dipinghje una cità in culori sulari chi mettenu in relievu l’italianità di Bastìa, chì appare più Signora. In veru capu d’orchestra Marsily mette in armunia u scrittu è u vede per cantà un’opera chjamata Bastia. In a luce d’ogni ritrattu si lascia intravede l’anima bastiaccia. L’autore spone i so ritratti è dedicheghja u so libru durante u prossimu festivale di u filmu talianu da u 5 à u 12 di ferraghju à u teatru di Bastia.