Voce Nustrale

Nutiziale culturale

Corsica
6 di dicembre

Da scunghjurà a sorti, l'8 di dicembre esce u secondu dischettu di u gruppu Cuscenza

Trè anni dopu à « Da francà u mali » u so primu dischettu, a squadra di Cuscenza escerà di manera ufficiale u so secondu l’ottu di dicembre, una data, di sicuru, chè u gruppu hà vulsutu simbolica quant’è u primu…

Trè anni sò passati dapoi ch’ellu hè esciutu « Da francà u mali », u primu dischettu di a squadra pumuntica di « Cuscenza ». Una squadra chì, ci vole à dilla, hà fattu a so strada in issi tempi quì. Puchissimi tempi ancu per una ricunniscenza...Quattru ghitarre, una bassa, un viulinu, una batteria, ottu voce per un primu dischettu chì hà fattu a nuturietà d’un gruppu natu in u 2015 d’un scontru trà amichi di l’Università. Dapoi, cuncerti, serate di sustegnu, animazione diverse senza sminticà u famosu « Cantu di l’Orsu », l’innu di l’ACA. « Esiste », « Monte Gozzi », « Passi », « Orizonti », « Trà passioni è offesa », « Sò di quidda », eccu unepoche di canzone chì anu sulcatu u chjassu d’issu gruppu di ceppu aiaccinu o di u circondu è chì cerca à mette in vale in e so creazione, a parlata pumuntinca. Una squadra abbastanza ghjovana (da 23 à 30 anni per i so membri) è a vulintà di prumove u cantu è a lingua corsa.

In puchissimi tempi, hà acquistu una certa nuturietà chì li permette, oghje, d’esse paru cù d’altri gruppi più anziani. Cusì, a squadra, hà travagliatu nantu un secondu dischettu. Chjamatu « Da scunghjurà a sorti », marca una certa evoluzione dopu à u primu. E canzone « Quist ut deus » (scrittu di Martinu Squarcinu è musica di Marc’Antò Benetti) è « U to fiddolu t’aspetta » (Parolle è musica di Simon Paulu Ferrandi) sò dighjà esciute nantu à e rete suciale. In tuttu, ci sò quindeci tituli di tematiche varie nantu à issu discu novu. A squadra, ella, scambia pocu. Solu trè nuvelli Pierre-Louis Parrigi (ghitarra), Julien Petit (ghitarra bassa) è Thomas Wingert (voce, quellu ch’avia scrittu u famosu « cantu di l’Orsu »). Sempre intornu à li stessa andatura. Dopu à dui anni di travagliu, u gruppu hà registratu issu dischettu novu cù disegni fatti da Antea Perquis Ferrandi... Cum’è per « Da francà u mali », a squadra di Cuscenza hà sceltu a data simbolica di l’ottu di dicembre per esce u so dischettu novu. Una manera di marcà a so indiatura…

Origine : Journal de la Corse

 Indirizzu

Piazza Ghjuvanni Simonetti
20221 Cervioni

+04 95 38 12 83

 Rete suciale

Cuncezzione è realizazione Agence de communication L'Agenza