Nutiziale culturale

'Dumane tù', u novu dischettu di Delfina Girolami

Stu novu dischettu di Delfina Girolami hè un omagiu à u so babbu Richard. Ci interpreteghja e canzone ch'ellu hà scrittu è cumpostu. L'ogettivu hè di difende, di prumove stu patrimoniu è di spartelu cù u publicu. Avemu cusì dece canzone. 'Tempu' tratta di u tempu meteorologicu, u tempu testimone di e nostre gioie, di e nostre pene, chì invechja a ghjente è e cose. Un'altra canzona nant'à A casa di a fata, quella di a zitellina, di a memoria, di u ricordu, chì aspetta a presenza umana pè rinvivì.

Trè altre 'S'elli ci lascianu fà','Tocc'à tè' è 'Giovani corsi' nant'à l'avvene è a forza di a giuventù. A canzona 'Dumane tù' hè quella di Richard Girolami pè a so figliola. A canzona 'U vechju piobbu' chjama à u rispettu pè a natura. 'Funtane funtanelle' rammenta i puteri è benfatte di l'acqua. 'Ora di statina' hè un omagiu à i guardiani di u patrimoniu. 'U velenu' ella s'interrugheghja nant'à u COVID, e so origine è cunsequenze.