Nutiziale culturale

Eterna lotta, u novu dischettu di L’Arcusgi pè i so 40 anni

Stu nuvesimu dischettu ferma dunque in u solcu di a lotta d’indipendenza tracciatu da Louis Franceschi è altri dapoi u 1984. U titulu hè dinù quellu di l’ultima canzona di u dischettu dedicata à Yvan Colonna. D’altronde, hè stata presentata quasi dui anni dopu a sparizione di u militante naziunalistu. Dice Louis Franceschi : aviamu in core di fà una canzona in omagiu à Yvan Colonna. Hè stata scritta da Ghjuvan Tumasgiu Filippini in qualchì minutu dopu à l’esequie. Un testu forte è u so ripigliu : « A strada ripiglia fiatu, versu a nostr’indipendenza, senti sta voce di l’ombra, quella di a to partanza, chì ci guida u caminu, chì mughja fora a Francia ».

Canzone d’Eterna lotta sò dinù un omagiu à tutti i populi luttendu pè a so liberazione in Brittagna, Catalogna, Paese Bascu, Scozia… U culore musicale, u spiritu rivuluziunariu di L’Arcusgi sò mantenuti cù appena di mudernità pè i strumenti è a musicalità.