Nutiziale culturale

L'opera teatrale Murtoriu mercuri u 14 d’ottobre à u centru Una Volta di Bastia à 8 ore è mezu

Scritta è rialisata da Pierre Savalli, st’adattazione di u rumanzu emblematicu di Marcu Biancarelli hè una cronaca dillusa di a Corsica cuntempuranea in corsu, sottutitulata in francese chì si passa ind’unu di sti paesi di Pumonte, trà a so muntagna, rifugiu di i miti è di i valori tradiziunali, è a so facciata litturale vittima di e cunsequenze di a mudernità : materialismu, banditismu, curruzzione… Ghjè a morte d’un mondu, d’una Corsica à l’agunia dapoi a guerra di 14. Un universu induve si vede campà, ride, tene caru è addisperassi un librariu ogni tanu pueta (Jérémy Alberti), un pastore à l’anima pura (Nicolas Poli) è u so cuginu Charlie Martinetti, una corsa di u cuntinente (Violaine Nouveau), un intellettuale persu in e so idee Sampieru Medori.

Murtoriu hè un’opera ricca è cumplessa, particulare è universale, senza cuncessione nant’à a Corsica di stu principiu di vintesimu seculu, di ciò ch’è no simu. Si seguita i passi di Marc-Antoine, librariu è scrittore chì a vita sentimentale hè un fiascu. Campa solu ind’un paese di a muntagna corsa da induve assiste à labbottu d’una costa litturale snaturale. Natu da un’isula è da a so lingua Murtoriu hè un testu ispiratu è dulurosu. I so persunagi sò putenti, ci hè un ritimu narrativu intensu . Pierre Savali hà sviluppatu dinù u tema di l’amore è di l’amiciza chì leia i persunagi è chì si sprime in modu sfarente forse in Corsica cum’ellu mostra u rumanzu. Marcu biancarelli hà cullaburatu à st’adattazione, hà rimanighjatu u so libru.