Voce Nustrale

Nutiziale culturale

Corti
28 di maghju

Mostra “Nozze in Mediterraniu” ind'a caserna Padoue di Corti sin’à u 31 d’ottobre

Sta mostra prupone un viaghju visuale è litterariu trà l’Algeria è a Corsica d’eri è oghje. Presenta novi ritratti è video. Avemu duie creazione di i ritrattadori Fethi Sahraoui ilustrendu a vita nant’à u litturale di l’abitanti d’Alger, è di Christian Buffa, cumissariu di a mostra nant’à e ciuttate in mare di a giuventù bastiaccia da i rampali di a citadella. Traminduie parenu rispondesi, cunfondesi è fà valè e so differenze ind’un ghjocu di ribombi visuali cù vibrazione simile è dopu dissunente trà e duie sponde mediterranie. A mostra hè fundata dinù nant’à u rumanzu Noces d’Albert Camus, scrittore natu in Algeria traduttu in lingua corsa da Sébastien Quenot, è quellu di u scrittore corsu Ghjcumu Thiers, A funtana d’Altea. St’ultimu hè una voce isulana è mediterrania è un grande discorsu nant’à a Corsica scrittu in u 1989. In quant’à Noces, u giovanu Albert Camus enunzia a so visione di u mondu è di u Mediterraniu. Dui paesi, a Corsica è l’Algeria riprisentati da dui autori.


Ogni opera conta una storia cumuna à duie sponde è à tempu e so sfarenze trà eri è oghje. U scrittu rammenta u passatu. E fiure u presente. A mostra dà à vede sumiglie estetiche è emuziunale, minerale è umane aldilà di e sponde di u Mediterraniu è e storie ogni tantu turbate di a Corsica è di l’Ageria. Nant’à un muru, a prughjezzione di a video nant’à u mare di l’artistu Ange Leccia leia l’opere fotografiche grazia à i marosuli mediterranii chì parenu muntagne per via di l’orientazione verticale di a video rialisata in u 1991. A lettura di “Noces à Tipasa” da u scrittore è rialisadore Jean-Philippe Toussaint dà una dimensione viva è forse un’invitazione à a ciuttata in sta mostra mandata à i visitanti cum’ella hè riprisentata in l’affissu di “Nozze in Mediterraniu”

Artisti

 Indirizzu

Piazza Ghjuvanni Simonetti
20221 Cervioni

+04 95 38 12 83

 Rete suciale

Cuncezzione è realizazione Agence de communication L'Agenza