Nutiziale culturale

U prugettu Umani Terra di u canterinu Vincent Colonna, dettu La petite culotte

Da un viaghju à l’altru, Vincent Colonna hà custattatu chì troppu strumenti di musica dormenu è ùn so mai aduprati. Dunque, hà creatu un prugettu Umani Terra chì dà u surrisu è una seconda vita à i strumenti cù una canzona pè accumpagnallu. Stu prugettu hè diventatu cuncretu durante unu di i viaghji di u canterinu in l’isula di Cuba cù u so babbu. Dopu avè vistu un omu chì sunava nant’à un vechju piano, Vincent Colonna hà pensatu chì in casa soia, ci hè una decina di chitarre à l’aguaru. Cusì, l’artistu hà vulsutu fà qualcosa di sti strumenti abbandunati è hà fattu cunnosce a so idea ingiru à ellu.

Principia tandu a racolta Umani Terra pè raccoglie sti strumenti chì seranu mandati in un paese di u mondu tutti l’anni in un locu sfarente. Quist’annu, u primu inviu si ferà in un paese d’Africa. Dapoi a nascita di u prugettu, in mancu un mese più di 45 strumenti sò stati ricuperati. In stu modu, si tesse una catena di gioia trà quelli chì danu, quelli chì ricevenu è Vincent Colonna. Stu prugettu hè rinfurzatu da a canzona Umani Terra chì evucheghja i strumenti, i cuntenidori induv’elli sò messi, i surrisi postu chì, pè Vincent u strumentu hè un manera di rallegrà a ghjente, di porghje amore à i zitelli di u mondu. A musica ghjè a vita è forse serà l’occasione di creà future canzone, gruppi. Pè seguità u prugettu è sapè tutte l’infurmazione permettendu di dà strumenti nanzu a fine di st’aventura, cunsultate u situ https://www.umaniterra.fr/