Nutiziale culturale

Mostra Luce etrusca - Parures féminines étrusques à u museu d'Aleria

U percorsu Luce etrusca, parures féminines étrusques, presenta à u publicu pè a prima volta e cullezzione scuperte durante i scavi fatti trà l’anni sessanta è ottanta à u campu santu d’Aleria-Casabianda. St’adorni preziosi accumpagnavanu e donne etrusche da a vita à a morte è ci mostranu un aspettu di lussu è di distinzione ind’è i sgiò di sta sucetà antica. Avemu ghjuvelli in oru pè u più ma ancu in argentu è in bronzu mustrendu dinù a qualità di u travagliu di l’orefici etruschi. I scavi archeologichi cundutti in l’Italia sana palesanu numerosi ornamenti in oru rialisati trà l’8u seculu è a fine di u 3u seculu nanz’à Cristu. L’oreficeria etrusca hè rinumata in u mondu sanu pè e so qualità estetiche è tenniche.

L’oru hè una materia scarsa è preziosa, prezzata in tutte e culture pè a so bellezza, u so culore rimandendu à a luce di u sole è i so valori simbolichi, suciali è ecunomichi. A so inalterabilità è e so pruprietà fisico-chimiche ne facenu un materiale privilegiatu adattu à u travagliu d’orefice. Cusì, stu metallu diventa un simbulu nobile ricercatu da i sgiò. In Corsica, l’adorni in oru s’affaccanu in campi santi etruschi d’Aleria à parte da a metà di u quintu seculu nanz’à Cristu. 

L’evenimentu Luce Etrusca entre ind’una tematica cumuna di mostre in i musei di a CDC pè a perioda 2024-2025 sott’à u titulu genericu “Donne di Corsica”. In stu filu, avemu e Vénus di a prestoria à u museu di Livia, i ghjuvelli di e donne di l’Antichità in Aleria, Maria Cosway, a donna di e Luce in Merusaglia, Femin’Isula in Corti. E donne sò dunque à l’onore in i musei di Corsica è ghjè nurmale. Anu participatu à a Storia è à i grandi cumbattiti cuntempuranei. Ùn ci scurdemu quantunque di a Donna di Bunifaziu è di quella di Capula, Danielle Casanova è altre resistante corse.