Nutiziale culturale

Noi, u primu dischettu di u gruppu L’Avvinta

In a cuntinuità di a so sperienza cù u cuncertu Mezu Mezu dui, u gruppu isulanu esce u so primu dischettu : Noi. 

Hè una squadra nova è ghjovana chì face a so strada in l’universu di u cantu corsu. Un percorsu chì l’hà permessu di participà, d’ottobre scorsu, à u famosu cuncertu « Mezu Mezu » dui à « La Défense Arena » davant’à 20 000 persone. Un mumentu unicu di cumunione cù parechji artisti è gruppi.

Noi hè « Un titulu d’una canzona scritta è cumposta qualchì annu fà, hè u fruttu d’una cullaburazione cù parechji scrittori cum’è Alanu di Megliu (Contrabanderi) o Ornella Nobili (Stende l’ale), ghjovana pueta balanina, d’altri musicanti ghjunti à aduniscesi à stu prughjettu cù d’altri scrittori anu messu a so manu, cum’è Petru Squarcini o Ghjacumu Fusina è, di sicuru, i canterini di l’Avvinta.

A particularità d’issu dischettu, hè statu registratu in e cundizione « Live ». Hè una manera, per a squadra, di mustrà dighjà u so travagliu ch’elli cantanu inseme dapoi dighjà qualchì tempu.

Pè u canterinu Antoine Parodin, era dinò una manera di mette in vale una certa riflessione puetica. Hè una mossa artistica ma sopratuttu puetica induve avemu vulsutu palisà una certa nuvità in l’universu di u cantu corsu oghjincu. À tempu, hè una realità musicale chì ci assumiglia è ci curresponde.

Cù issu primu discu, u gruppu vole prisentà una spezia di spechju chì ripresenta a squadra, e so sensiblità musicale, a so manera di cuncepisce u mondu, u so parè nantu à a sucetà... « Hè dinò una manera di rende contu di l’ambiu è di i scambii ch’è n’avemu avutu durante l’estatina quandu avemu giratu in Corsica. Un bellu ritrattu. »

S’è pueta corsi anu participatu à issu dischettu, Antone Parodin è i so cumpagni anu scrittu è cumpostu qualchì canzona. Ogni cantu ci face sente un’epica. Cù issi cinque tituli, una certa maturità musicale si risente dinò. E sunurità muderne currespondenu à u campà d’issi ghjovani. « L’influenze musicale sò diverse in u gruppu, certi anu fattu u cunservatoriu, d’altri anu una furmazione piuttostu tradiziunale o una pratica di a ghitarra particulare, cum’è Laurent Matteaccioli chì face u rock cù un altru gruppu. Hè st’inseme chì face l’Avvinta. U nostru scopu hè d’avè una musica simplice, scritti capiscitoghji. » 

Un stilu chì cerca à mette in vale a puesia corsa. A canzona « I Campu » scritta è cumposta da Antone Parodin è Laurent Matteaccioli rispechja u talente musicale di a squadra... Dapoi u principiu, L’Avvinta s’hè allargatu per dà un inseme d’un decina di ghjovani ch’anu participatu à u dischettu : Lisandru Bonini, Laurent Matteaccioli, Francè Muraccioli, Don Louis Castola-Luccioni, Antone Parodin (canti), Niculau Giovanetti, Petru Francescu Ucciani (ghitarra) Dumè Bevilacqua (bassa), Romain Gianelli (percussione), Pierrot Agostinetti (bassa). U gruppu face a prumuzione d’issu dischettu nanzu d’appruntà ne forse, un altru. 

Origine : Journal de la Corse