Nutiziale culturale

Mostra “Via Crucis, trà a terra è a luce” à u museu di Bastia da l’8 di nuvembre à u 20 di dicembre

A mostra face a leia trà dui artisti taliani, separati da più d’un seculu ma chì anu u listessu temu d’ispirazione : e viacruci. À u XIXu seculu, Luigi Brunetti hà rialisatu pè a catedrale di Bastia un’opera nant’à a Passione di u Cristu chì hè stata risturata pocu fà. Ci truvemu una sensibilità prufonda di fronte à a suffrenza, a fede è a speranza. Quasi 150 anni dopu, l’artistu è risturadore Renato Boi face rinvivì ste tele. A tempu presenta e so viacruci persunale, cuncepite in l’anni nuvanta, induve tradizione iconografica è spressione cuntempuranea si scontranu. Cusì, a mostra “Via Crucis, trà a terra è a luce” presenta sti dui sguardi, una traversata di u tempu è di u sacru, a cuntinuità di l’ispirazione religiosa è l’impurtanza di a risturazione cum’è attu di trasmissione è di creazione.