Nutiziale culturale

Omagiu di Bastia à l’artistu Dominique Degli Esposti da u 6 à u 23 di ghjennaghju

Da u 6 à u 23 di ghjennaghju, a cità di Bastia rende omagiu à Dominique Degli Esposti cù mostra, prughjezzione di filmu è cunferenza. Natu in u 1946 à A Venzulasca, principia a so vita d’artistu à u liceu di Bastia. Ampara a pittura è a rialisazione. Dopu sviluppa i so arti in u so nidu di Castellare di Casinca : pittore, artistu plasticu, ritrattadore, rialisadore… Cusì, viaghja in u mondu sanu. Diventa cavallieru di l’arti è di e lettere è attore maiò di u Riacquistu in l’anni settanta. Ma lasciava a grande scena di l’arti pè andassine à l’altru mondu di lugliu 2024. A prima parte di st’omagiu presenta a mostra stallata à l’Arsenale di a citadella rammentendu sessant’anni di creazione : ritratti, tele, filmu, cinema, teatru… Ghjè un universu artisticu è persunale nant’à u tema di e bandere emblematiche : Testa Mora è Core Rossu in leia cù l’amore, a brama è a libertà. L’inaugurazione hè prevista u 6 di ghjennaghju à 6 ore è mezu à l’Arsenale è si puderà fighjalla sin’à u 23 di ghjennaghju.

Dopu, seguiterà un altru omagiu à Dominique Degli Esposti, cù a diffusione di u so filmu « Brusgiature », marti u 13 di ghjennaghju à 6 ore è mezu à u cinema Le Régent. Hè statu rialisatu in 1972 in Nonza, Moltifau, Figarella, Erbalonga è in u desertu di l’Agriate. Hè esciutu in u 1983 durante u festivale di u film di e Culture Mediterranie di Bastia. Hà ricevutu u premiu di u Cunsigliu Internaziunale pè a Télévision è u Cinema (Unesco). Hè statu selezziunatu in u 1985 à u Festivale di Cannes. Ghjè un filmu baroccu induve u sacru si mischja cù u profanu è u vulgare scontra u pueticu. Tratta di temi universali è miti fundatori : u paradisu, l’amore, Adamu è Eva, Romeu è Ghjulietta…

Infine, marti u 20 à 6 ore è mezu, A casa di e lingue, di u spaziu Sant’Angelo, presenta u scontru « Da a Corsica à l’Universale : l'Opera di Dominique Degli Esposti », animatu da Jeanine Vittori, cù a participazione di Vannina Bernard-Leoni, cumissaria di a mostra, Marcel Fortini, direttore di u Centru mediterraniu di u ritrattu è Michel Rossi, amicu di l’artistu. Inseme, s’interesseranu à a dimarchja singulare di Dominique Degli Esposti, a so leia prufonda à a Corsica è a so manera chì a so opera apri nant’à l’universale.