Nutiziale culturale

Quaterni teatrini 'Semu lecchi etc' di Paulu Desanti è Filippu Guerrini, edizione Albiana - CCU

Una lingua, dui autori trè opere teatrale : Tombula !

A lingua corsa è u tiatru sò in festa cù ssi pezzi di Desanti è Guerrini, bè cunisciuti pà u so spiritu estrosu, macagnonu è - à tempu - riflitosu... 

Presentazione

Issi trè tituli, quasi quasi puderianu esse e trè parte di un’analisi etnulogica, sociulogica, psiculogica o psicusuciulogica… Umbèh, assai ne sò eiu… Andate à sapè voi s’è l’autori ùn ci annunzianu custì ch’elli s’approntanu à presentà un prugrama puliticu pè a squatra ch’elli purterianu à e prossime elezzione… Merà, tuttu hè pussibule oghje ghjornu.

Sarianu trè parte di un custattu ? 1. Simu lecchi : bilanciu pessimistu di una trafalata definitiva, 2. Un paese da sfà : sfocu arrabbiatu, è po’ in 3., Vita d’un anarchistu corsu : ripigliu in manu di una situazione cù un prugettu libertariu per tutti ed ognunu di noi ?

L’amichi Paulu è Filippu ci farianu sente cusì cum’elli sò pronti elli à indià si è dirige issu muvimentu custindi ?

Pare pussibule l’affare, tantu più chì issu « messagiu », appughjendu si nant’à u garbu, u talentu è a pupularità di I Stroncheghjetta o di Tutt’in scena (pè Semu lecchi) hè capace à fà tombula ! À chì leghje ste trè pezze hè vera chì u successu pare assicuratu. U fine torna certu è sicuru sfuglittendu sta racolta duve ribombanu e sciaccamanate d’un publicu chì si campa ad ogni rapresentazione.

Eiu nucentone, l’aghju detta ingiru à mè. È bè, à chì m’hà mughjatu, à chì mi hà giratu u spinu è po’ ancu nigatu u mottu ! Dicenu ch’issu teatru saria un sguardu criticu nantu à a Corsica è a so identità, è a spressione teatrale umuristica permetteria à l’autori di custruisce un’affresca. Saria atta à apre l’ochji inquantu à una situazione chì unepochi ghjudichecanu di cambiamentu negativu è angusciosu, è certi di mutazione, apertura è accessu à idee nove di l’identità. Allora mi dumandu… mi dumandu s’o ùn mi sò micca sbagliatu… È fà è fà, leghju è rileghju… È à quandu unu à quandu un altru, mi rivene à mente ogni passu d’issu libru…

                                                                                                                                            G. Thiers