Nutiziale culturale

Sò ella, u novu dischettu di I Campagnoli

In cullaburazione cù l'associu Donne Sulidarie, u gruppu I Campagnoli s'impegna contr'à e viulenze fisiche è psiculogiche nant'à e donne cù stu sestu dischettu. Novi tituli pè un umagiu à e donne è sensibilizà u publicu à ste viulenze cù altre canzone nant'à tematiche più classiche pè u gruppu (umagiu à e vittime di u Bataclan cù a canzona 'Tendone Rossu', pulifunie cantendu persunalità di a Bibbia, adattazione di famose canzone francese in lingua corsa, cum'è 'Millésime', cantata cù u so autore Pascal Obispo, pè mette tutte e lingue à parità). 

Pè insignà u rispettu, sò previsti un spettaculu è attelli di sensibilizazione à prò di i sculari in u quadru d'un prugettu pedagogicu in cullaburazione cù a cumunità d'agglumerazione di Bastia, Donne Sulidarie è a merria di Bastia. Durante st'attelli, i zitelli seranu invitati à fà disegni nant'à a nuzione di rispettu è seranu sposti durante cuncerti di u gruppu. Si ferà dinù un single cù e parolle scritte secondu i sintimenti spressi da i zitelli durante l'attelli. I fondi racolti anderanu à Donne Sulidarie. 

U spettaculu serà rializatu da Marie-Ange Geronimi, nant'à i temi di a storia, l'amore è u sacru. Pè l'occasione, tutte e canzone di u gruppu sò state riurchestrate da Jean-Michel Giannelli. E donne seranu à l'onore. Delphine Nafteux ballerà cù i canti di I Campagnoli, accumpagnati durante certe canzone da Elisa Tramoni, Doria Dousset, Marie-Ange Geronimi, Anna Rocchi, a curale di a scola di cantu E stelle di Biguglia. Prughjezzione è disegni seranu rializati in direttu da Armand Luciani è Tony Azzaro.